தேவனுடைய வார்த்தையின் மேல் சாத்தானின் போர்

இந்த தூதன் வெற்றி முழக்கமிடுவதாக சொல்லப்பட்டிருந்ததிலிருந்து, அவன் இதற்கு முன் ஒரு யுத்தத்தில் ஈடுபட்டுள்ளான் என்றும் நாம் அறிந்துகொள்ளலாம். அதுதான் தேவனுடைய வார்த்தை ஜனங்களுக்குக் கிடைக்காமல் செய்ய சாத்தான் ரோமன் கத்தோலிக்க ராஜ்ஜியத்தை பயன்படுத்தி பரிசுத்தவான்களுக்கு எதிராக செய்த யுத்தம் என்று ஏற்கனவே பலமுறை குறிப்பிட்டுள்ளேன். சத்திய வேதவசனங்களை ஜனங்கள் அறிந்துகொண்டால் அவர்கள் தனது கள்ளப்போதகங்களை வேறுபிரித்து அறிந்துகொள்வார்கள் என்பது சாத்தானுக்கு நன்கு தெரிந்த ஒன்று. ‘எழுதியிருக்கிறதே’ என்று சொல்லி சாத்தானைத் துரத்திய இயேசுவின் பரிசுத்த வேதவார்த்தைகள் ஜனங்களுக்குக் கிடைத்துவிட்டால், தான் பயன்படுத்திவரும் ரோமன் கத்தோலிக்க சபையின் அத்தனை வஞ்சனைகளும் ‘வெளிச்சத்திற்கு’ வந்துவிடும் என்று தெரிந்துதான் பல நூற்றாண்டுகளாக ஜனங்களின் கையில் வேதப்புத்தகம் கிடைப்பதை எதிர்த்து செயல்பட்டுவந்தான். ஜனங்கள் பைபிளை அறிந்துகொண்டால் ‘இயேசு உயர்த்தப்படுவார்’, போப்புகளின் அந்தஸ்து தாழ்த்தப்படும் என்று தெரிந்தே அவர்களும் இதை அனுமதித்தனர். இந்த தேவனின் வார்த்தைகளுக்கு எதிரான யுத்தம் கிழக்கு ரோம ராஜ்ஜியம் (காண்ஸ்டாண்டிநோபிள்) வீழ்ச்சியடைந்த அடுத்த வருடமே முடிவுக்கு வந்தது. இதன் பலனாக பைபிள் சாதாரண மக்கள் கைகளிலும் கிடைத்தது என்பதை ஒரு வரியில் சொன்னாலும், அதற்குப்பின் இருக்கும் பலரின் தியாகங்களைப் பார்க்காமல் நாம் இந்தப்பகுதியைப் புரிந்துகொள்ள முடியாது.

பைபிளின் வரலாறு (சிறு புஸ்தகம்)

• முதலாம், இரண்டாம் நூற்றாண்டுகள்: சுவிசேஷ புத்தகங்கள் மற்றும் நிருபங்கள் கைப்பிரதிகளாக எடுக்கப்பட்டு பயன்படுத்தப்பட்டது. குறிப்பாக அந்தியோகியாவில் (Antioch) இருந்த கிறிஸ்தவர்கள் இதைத் தீவிரமாக செய்துவந்தனர்.
• சுமார்கி.பி. 400 களில்: பழைய ஏற்பாட்டின் 39 புத்தகங்களும், புதிய ஏற்பாட்டின் 27 புத்தகங்களும் வேதாகமமாகத் தொகுக்கப்பட்டது. இந்த காலத்தில் ரோமன் கத்தோலிக்க சபை மூலம் பைபிளாக வெளிவந்த The Vulgate பைபிளில் சில திருத்தங்களை தங்களுக்கு சாதகமாக செய்துகொண்டார்கள் என்ற புகார் இன்றுவரை இருக்கிறது.
• ஆறாம்நூற்றாண்டு முதல் 13 ஆம் நூற்றாண்டு வரை: லத்தீன் மொழி தவிர மற்ற மொழிகளில் பைபிள் உபயோகப்படுத்தப்படுவது போப்புகளால் தடை செய்யப்பட்டது. மற்ற மொழிகளில் இருந்த பைபிள்கள் பொதுஇடங்களில் வைத்து எரிக்கப்பட்டது. மீறி, இரகசியமாக வைத்திருந்தவர்கள் திருச்சபையின் துரோகிகள் என்று குற்றம்சாட்டப்பட்டுக் கொல்லப்பட்டார்கள். இதைச் செய்தது திருச்சபைகளின் தாய் என்று தன்னை சொல்லிகொள்ளும் கத்தோலிக்க சபைதான் என்பதை நீங்களே வரலாற்றில் ஆய்வுசெய்து பாருங்கள்
• வால்டென்ஸியன்ஸ் (waldensians 1170-1217 AD) என்ற இத்தாலியை சார்ந்த ஒரு கூட்டத்தினர், ‘திருச்சபை சட்டங்கள் அல்ல, வேதமே விசுவாசத்திற்கும், வாழ்க்கைக்கும் இறுதியான அதிகாரமுடையதாக இருக்கவேண்டும்’ என்று சொல்லி சுவிசேஷம் அறிவித்து வந்தனர். மேலும் ஒவ்வொரு மனிதனுக்கும் அவனது தாய்மொழியில் வேதம் இருக்கவேண்டும் என்று சொல்லி பைபிள் மொழிபெயர்ப்புகளிலும் ஈடுபட்டு வந்தனர். போப்புகள் இவர்களை ஒடுக்கி, துன்புறுத்தி, அந்த இனத்தையே படையெடுப்புகள் (Crusades) மூலம் அழித்தனர்.
• இதேகாலக்கட்டத்தில் பிரான்ஸின் ஆல்ப் மலையோரங்களில் வாழ்ந்த ஒரு குழுவினர் (அல்பிஜென்ஸஸ்- Albigenses) ரோமன் கத்தோலிக்க சபையின் சொரூப வணக்கம், உத்தரிக்கும் ஸ்தலம், போப்புகளை வழிபடுவது போன்றவற்றை எதிர்த்து, சபையை புதிய ஏற்பாட்டின் அடிப்படையில் வழிநடத்திச்செல்ல நிர்பந்தித்தனர். போப் மூன்றாம் இன்னொசெண்ட் கி.பி 1208-1209 களில் இவர்களுக்கு விரோதமாகப் போர் தொடுத்து ஏராளமான படுகொலைகளை செய்து அழித்தார்.
• ஜான்விக்ளிஃப் (கி.பி 1329-1384): இவர் கத்தோலிக்க சபையின் திருவிருந்து பற்றிய தவறான போதனைகளையும் (Transubstantiation) போப்புகளின் அட்டூழியங்களையும் எதிர்த்து பிரச்சாரம் செய்ததுடன், பைபிளை 1380-1384 களில் ஆங்கிலத்தில் மொழிபெயர்த்தார். இதற்காக இவர் பல உபத்திரவங்களை சந்தித்தார். இவர் தான் ‘மறுமலர்ச்சியின் விடிவெள்ளி’ என்றழைக்கப்படுகிறார்.
• ஜான்ஹஸ்: இவர் பரிசுத்த வேதத்தில் சொல்லப்படாத கத்தோலிக்க திருச்சபையின் உபதேசங்களையும், பழக்கவழக்கங்களையும் கண்டித்து புரட்சி செய்தார். இதனால் கி.பி 1415 ஆம் ஆண்டு கத்தோலிக்க சபை மன்றத்தின் ஆணையின்பேரில் உயிரோடு தீயிலிட்டு கொழுத்தப்பட்டார்.
• ஜெரோம்சவனரோலா (கி.பி 1452-1498): இவரும் மறுமலர்ச்சிக் கொள்கைக்கு ஆதரவாக பிரச்சாரம் செய்தததால் அப்போதைய போப் இவரை மரத்தில் தூக்கிலிட்டுக் கொன்றார். பின்னர் இவரது சடலம் பிளாரன்ஸ் நகர மையத்தில் தீயிலிட்டுக் கொளுத்தப்பட்டது.
• ஜெர்மனியின் ஜோகன்ஸ் குட்டன்பெர்க் என்பவரால் கண்டுபிடிக்கப்பட்ட அச்சுஇயந்திரத்தால் முதல் அச்சடிக்கப்பட்ட புத்தகமாக பைபிள் வெளிவந்தது. அது Guternberg Bible என்றே அழைக்கப்பட்டது. சுவிசேஷம் பரவ வேண்டும், எல்லோர் கைகளிலும் பைபிள் என்ற சிறு புஸ்தகம் கிடைக்கவேண்டும் என்ற தேவனுடைய திட்டம் மிகச்சரியாக நிறைவேறியது (Between 6^th and 7^th trumpet). இதற்குப்பின்பு அச்சிடப்பட்ட பைபிள்கள், புத்தகங்கள், கைப்பிரதிகள் வெளியாவது எளிதாக மாறியது.
• மார்டின்லூதர் கி.பி 1517 ஆம் ஆண்டு பைபிளை ஜெர்மன் மொழியில் வெளியிட்டார். இதிலிருந்து தான் சுவிசேஷமும், மறுமலர்ச்சியும் உலகமெங்கும் வெடித்துப்பரவியது. வால்டென்ஸியன்கள் தங்கள் கைகளில் இருந்த ஒரிஜினல் வேதசுருள்களைக்கொண்டு மிஷனரிகளை பல இடங்களுக்கு இரகசியமாக அனுப்பி சுவிசேஷத்தை விதைத்தார்கள். அந்த விதை தான் புராட்டஸ்டண்ட் மறுமலர்ச்சிக்கு வித்திட்டது. அது ஜான் விக்கிளிப் காலத்தில் வளர ஆரம்பித்தது; லூதரின் காலத்தில் பலன் கொடுத்தது; இன்று நாம் அதன் கனிகளை ருசித்துக்கொண்டிருக்கிறோம். இதற்கு மேல் இன்னொரு வசனம் கிடைக்காத இருண்டகாலம் வரும் என்ற நம்பிக்கை அடிப்படை ஆதாரமற்றது. விசுவாசிகளின் இருதயம் வேண்டுமானால் நம் காலக்கட்டங்களில் இச்சைகளினால் இருண்டு வசனம் நுழைய இடம்கொடுக்காத அளவுக்கு போகலாம்.
• வில்லியம் டிண்டேல் என்பவர் புதிய ஏற்பாட்டை ஆங்கிலத்தில் மொழிபெயர்த்து வெளியிட்டதால் (Tyndale Bible-1526 AD) கத்தோலிக்க சபையால் எரித்துக்கொல்லப்பட்டார். அவர் எரிந்து கொண்டிருக்கும்போது சொன்னது என்ன தெரியுமா? ‘‘ஆண்டவரே இங்கிலாந்து மன்னனின் கண்களைத் திறந்தருளும்’’
• இந்தஇரத்த சாட்சியின் கூக்குரலைக் கேட்ட ஆண்டவர் இங்கிலாந்து மன்னர் எட்டாவது ஹென்றியின் கண்களைத் திறந்ததால் அவர் சுவிசேஷத்தை ஏற்றுக்கொண்டு கி.பி 1540 ல் The Great Bible என்ற அங்கீகரிக்கப்பட்ட வேதாகம மொழிபெயர்ப்பை வெளியிட்டார்.
• கி.பி1560ல் முதல் முறையாக அதிக அளவில் அச்சடிக்கப்பட்ட, சாதாரண குடிமக்களுக்கும் கையில் கிடைத்த பைபிள் என்ற பெருமையை The Geneva Bible பெற்றது.
• இந்தவரிசையில் கி.பி 1604 ஆம் ஆண்டு இங்கிலாந்து மன்னன் ஜேம்ஸ் என்பவரது முயற்சியால் அமைக்கப்பட்ட விசுவாசமிக்க ஒரு குழுவினரால் ஆங்கிலத்தில் மொழிபெயர்க்கப்பட்டு வெளிவந்தது தான் இன்றுவரை உலக அளவில் அங்கீகாரம் பெற்று நம் கைகளில் தவழ்ந்துகொண்டிருக்கும் ‘The King James Version’ (KJV-1611).
• இந்தகாலக்கட்டத்தில் தான் புறஜாதி இந்தியர்களான நம்மையும், நம்மைப்போன்ற உலகின் பல புறஜாதியினரையும் கர்த்தர் நினைவு கூர்ந்ததினால், இரண்டு நூற்றாண்டுகளுக்கு இந்தியா உட்பட உலகின் 25% நிலப்பரப்பை இங்கிலாந்து வசம் ஒப்புக்கொடுத்தார். அவர்களின் காலனியாதிக்கத்தின் விளைவாகத் தான் மிஷனரிகள் நம் நாட்டிற்கும் வந்து சுவிசேஷம் அறிவித்து நம்மையும் கிறிஸ்துவுக்குள்ளாக்கினார்கள். இந்த திட்டத்திற்கு உதவிகரமாக இருந்ததே இந்த சிறு புஸ்தகமாக இருந்த பைபிள் தான்.
• தமிழகத்திற்கு மிஷனரியாக வந்த பர்தொலோமேயு சீகன்பால் தரங்கம்பாடியில் ஊழியம் செய்ததுமில்லாமல் முதன்முதலில் தமிழில் சுவிசேஷ புத்தகங்களை மொழிபெயர்த்தார்.
• இதேசமயம் 1800 களில் வில்லியம் கேரி பல இந்திய மொழிகளில் பைபிளை மொழிபெயர்த்தார்.

படம் 70: நம் கைகளில் இருக்கும் வேதம்