இந்த வசனங்களில் நோவாவின் காலத்தை, மனுஷகுமாரன் வரும் காலத்தோடு ஒப்பிடப்பட்டுள்ளது. இதைப் பலர் இரண்டு வருகைக்கு ஒப்பான உவமையாக எடுத்துக்கொண்டு போதிக்கின்றனர். ஜலப்பிரளயத்தை உலகத்தின் அழிவிற்கும், அதற்கு முன்னாக நோவாவும் அவரது குடும்பமும் பேழைக்குள் பாதுகாக்கப்பட்டதை அந்திகிறிஸ்துவின் ஆட்சிகாலத்திற்கு முன்னான இரகசிய வருகையில் சபை எடுத்துக்கொள்வதற்கும் ஒப்பிட்டு போதிக்கின்றனர். ஆனால் உண்மையில் இவ்வசனங்கள், நோவாவின் காலத்தில் ஜனங்கள் கடைசி அழிவு வரும்வரை எப்படி ‘காலத்தின் அருமையை உணராதிருந்தார்களோ’, அதுபோலத் தான் இந்த கடைசி நாட்களில் இருக்கும் மக்களும் எத்தனை முறை எச்சரித்தாலும் இயேசுவின் வருகை நடக்கும் நாள் வரையில் உணராமலும், மனம் திரும்பாமலும் வழக்கமான வாழ்க்கையை வாழ்ந்துகொண்டிருப்பார்கள் என்பதையே விவரிக்கிறது. இதை நீங்களே ஆராய்ந்து பாருங்கள்.

சிலர் ஜலப்பிரளயம் வருவதற்கு முன்பு நோவாவின் குடும்பம் காக்கப்பட்டது போல, கடைசி 7 வருடங்களில் அந்திகிறிஸ்துவின் உபத்திரவ காலத்திற்கு முன்பு பரிசுத்த சபை எடுத்துக்கொள்ளப்படும் என்று நம்புகின்றனர். ஒருவேளை அப்படியே எடுத்துக்கொண்டாலும், நோவாவின் காலத்தில் மனம் திரும்பாமல் வெள்ளத்தில் அகப்பட்டவர்களுக்கு இரண்டாம் வாய்ப்பு கொடுக்கப்படவில்லை என்பதை மனதில் கொள்ளவேண்டும். நோவாவின் குடும்பத்தைத் தவிர எல்லாரும் அழிந்து போனார்கள். அந்திகிறிஸ்துவின் 7 வருட ஆட்சிக்குப் பின்பு தான் இயேசு பகிரங்கமாக வெளிப்பட்டு, உபத்திரவங்களைத் தாங்கி விசுவாசத்தைக் காத்துக்கொண்ட யூதர்களையும், மற்ற ஜனங்களையும் மீண்டும் அழைத்துச் செல்வார் என்ற ‘இரண்டாம் வாய்ப்பு’ தான் பலருடைய விசுவாசத்தை வழுவச் செய்யும் தவறான போதனையாகும். மேலும் இயேசுகிறிஸ்து வானத்தில் தூதர்களோடும், எக்காள சத்தத்தோடும் வெளிப்படும்போது, ஒரு கூட்டம் எடுத்துக்கொள்ளப்படும், ஒரு கூட்டம் கைவிடப்படும் என்று தான் மேற்கண்ட வசனங்கள் சொல்கின்றதே தவிர, விசுவாசிகள் இரகசியமாய் எடுத்துக்கொள்ளப்படுவார்கள் என்று சொல்லவில்லை. கைவிடப்பட்ட ஒரு கூட்டத்தாருக்கு இன்னொரு வாய்ப்பு கொடுக்கப்பட்டதா என்பதை ஆரய்ந்து பாருங்கள்.

லோத்தின் நாட்கள்

கடைசி நாட்களின் சம்பவங்களை லோத்தின் நாட்களில் நடைபெற்ற அழிவையும், அவர் குடும்பம் மட்டும் காப்பாற்றப்பட்டதையும் ஒப்பிட்டு இயேசு கூறியுள்ளார்.