இந்த சின்னக்கொம்பு தான் நமது கதைக்களத்தின் அதிமுக்கிய வில்லன் என்பதாலும், அவனைப்பற்றி நாம் நிறைய தெரிந்துகொள்ள வேண்டியிருப்பதாலும், இந்த பத்துகொம்புகளாகிய பத்து ராஜாக்களையும், சின்னக்கொம்பாகிய அந்திகிறிஸ்துவையும் நாம் அடுத்து தனி அத்தியாயமாகப் பார்க்க இருக்கிறோம். இந்த வசனங்கள், மேற்கு ரோம சாம்ராஜ்ஜியமானது கி.பி 476 ல் பத்து ராஜ்ஜியங்களாக உடைந்ததை நமக்குத் தெளிவாக உணர்த்துகிறது.

மதமாற்றமும் மனமாற்றமும்

இதற்கு இடைப்பட்ட காலத்தில் (கி.பி 285-476) ரோமப்பேரரசின் அரசாங்க மதமாக கிறிஸ்தவம் (கான்ஸ்டாண்டைன் மூலம்) மாறியிருந்து அநேகர் கிறிஸ்தவர்களாக மாறியதால், ஏராளமான ஆலயங்கள் கட்டப்பட்டு கத்தோலிக்க கிறிஸ்தவம் உலகமெங்கிலும் பரவியிருந்தாலும், இந்த சம்பவங்கள் தரிசனங்களில் முக்கியத்துவம் பெறவில்லை. இத்தனை சம்பவங்களை விளக்கமாக சொல்லிய ஆண்டவர் உலகில் பெரும்பாலானோர் கிறிஸ்தவத்தைத் தழுவியதை ஏன் வெளிப்படுத்தவில்லை என்று உங்களுக்கு சந்தேகம் வரவில்லையா? கண்டிப்பாக வரவேண்டும். ஆனால் நாம் எதிர்பார்ப்பதற்கு மாறாக ஆண்டவர் இந்த ராஜ்ஜியம்/சின்னக்கொம்பு ‘பரிசுத்தவான்களைத் துன்புறுத்தியது; கொன்று அழித்தது; இயேசுவின் சாட்சிகளுடைய இரத்தத்தில் வெறிகொண்டது; பரிசுத்தவான்களோடு யுத்தம் செய்து அவர்களை மேற்கொண்டது’ என்று தீர்க்கதரிசனமாக சொல்லியிருக்கிறார்.

இதன் மூலம் இந்த கிறிஸ்தவ மத மாற்றம் என்பது, வெறும் மதமாற்றமாக இருந்ததே ஒழிய, மனமாற்றமாக இல்லை என்பதையும், சிலை வழிபாட்டிலிருந்து வெளிவந்த கிறிஸ்தவமாகவும் இல்லை என்று அறிந்துகொள்ளலாம். ஏனென்றால் கிறிஸ்தவத்தைப் பின்பற்றுவதாக சொல்லிகொண்டு, தேவன் அடியோடு வெறுக்கும் விக்கிரக வணக்கத்தை பூமியின் குடிகள் தொடரும்படி வழிநடத்திய அந்திகிறிஸ்துவாகிய சின்னக்கொம்பின் ராஜ்ஜியம் இதுதான். இயேசுவை உண்மையாகப் பின்பற்றி வாழ்ந்த சீடர்களைத் துன்புறுத்தியதும் இதுதான். இதை அடுத்த அத்தியாயத்தில் ‘வசன ஆதாரத்தோடு’ பார்க்க இருக்கிறோம்.

மிருகங்கள்: ஒரு ஒப்பீடு

தானியேல் 7 ஆம் அதிகாரத்தில் சொல்லப்பட்டுள்ள நாலாம் மிருகம், வெளிப்படுத்தல் 12,13 மற்றும் 17 ஆம் அதிகாரங்களில் சொல்லப்பட்டுள்ள மிருகங்கள் ஒரே ராஜ்ஜியத்தை தான் குறிக்கின்றன என்பதை நீங்கள் எளிதில் புரிந்துகொள்ளும் வகையில் அவைகளை ஒப்பிட்டு அத்தியாயம் 19 ல் அட்டவணைப்படுத்தியுள்ளேன். இவைகளின் நிறைவேறுதலையும் சுருக்கமாக அட்டவணையில் கொடுத்துள்ளேன். முதல் முறை நீங்கள் இதை வாசிக்கும்போது புரிவதில் சிரமம் இருக்கலாம். நீங்கள் ஒருமுறை இந்த அதிகாரங்களை பரிசுத்த வேதத்தில் வாசித்துவிட்டு, திரும்ப இந்த அட்டவணையை வாசித்தால் ஓரளவு புரியும். பின்வரும் பெரும்பாலான அத்தியாயங்கள் இவற்றை அடிப்படையாகக் கொண்டே இருப்பதால் இந்தப் புத்தகத்தை நீங்கள் முடிக்கும் வேளையில் நிச்சயமாகத் தெளிவுபெற்றுவிடுவீர்கள் என்று கர்த்தருக்குள் விசுவாசிக்கிறேன். இதில் ஒவ்வொரு வார்த்தையும் முக்கியம். இதில் வரும் சங்கேத வார்த்தைகளுக்கான வேதவிளக்கங்களை ஆங்காங்கே சம்பந்தப்பட்ட அத்தியாயங்களில் கொடுத்துள்ளேன்.

இந்த அட்டவணையிலிருந்து அந்திகிறிஸ்துவாகிய சாத்தானின் ராஜ்ஜியத்தைப் பற்றி ஆண்டவர் சொல்லிவைத்திருக்கிறவைகளை சில விளக்கங்கள் மூலம் பார்க்கலாம்.

1. ரோம சாம்ராஜ்ஜியம் தான் உலக வல்லரசுகளில் பலம் வாய்ந்தது மட்டுமல்லாமல் இயேசுவின் இரண்டாம் வருகை மட்டும் ஏதாவது ஒரு வடிவத்தில் நீண்ட காலம் நிலைத்துநிற்கும்.
2. பூமியின் பெரும்பாலான ஜனங்கள் அந்திகிறிஸ்துவாகிய ரோமன் கத்தோலிக்க சாம்ராஜ்ஜியத்தின் வஞ்சகங்களுக்கு, விக்கிரக வணக்க வழிபாடுகளுக்கு கீழ்படிய தங்களை ஒப்புக்கொடுப்பார்கள். இன்றுவரை உலகின் மிகப்பெரிய மக்கள்தொகையைக் கொண்டது ரோமன் கத்தோலிக்க சபை. இதைப்பார்த்து யோவான் ஆச்சரியப்பட்டதில் தவறு இல்லையே.
3. ஏழு தலைகளைக் கொண்ட மிருகம் என்பது ஏழு ராஜ்ஜியங்களை சுமந்த சாத்தானின் ராஜ்ஜியம் என்று அர்த்தம். ஏழு தலைகளின் மேல் முடி என்பது ராஜாக்களால் (சீசர்) ஆளப்பட்ட ‘ஒருங்கிணைந்த ரோம சாம்ராஜ்ஜியம்’. பத்து கொம்புகள் மேல் முடி என்பது மேற்கு ரோம், பத்து ராஜ்ஜியங்களாகப் பிரிந்தபின்பு பத்து ராஜாக்களால் ஆளப்பட்டதைக் குறிக்கிறது.
4. பத்து கொம்புகளின் நடுவிலிருந்து எழும்பிய ‘சின்னக்கொம்பு’ மற்றும் மிருகத்தின் மீது ஏறியிருந்த வேசியின் ஆடை அணிந்த ஸ்திரீ, இந்த இரண்டும் ரோம சாம்ராஜ்ஜியத்தின் மீது ஏறி ஆட்சியைப் பிடித்த கத்தோலிக்க சபையையும், அதன் தலைவரான போப்புகளையும் குறிக்கும்.
5. இந்த இரண்டாம் வடிவிலான ரோம சாம்ராஜ்ஜியம் தான் இயேசுவின் உண்மை சீடர்களை 1260 வருடம் துன்புறுத்தியது என்பதற்கான ஆதாரங்களோடு அந்தந்த அத்தியாயங்களில் விளக்க உள்ளேன்.
6. ஒருங்கிணைந்த ரோமப்பேரரசு எப்படி விக்கிரக வணக்கத்தை ஆதரித்ததோ அதுபோலவே போப்புகள் தங்களை தேவனின் இடத்தில் வைத்து, சபையிலும் விக்கிரகங்களை வணங்கவைத்து தேவனுடைய நாமத்தை தூஷிக்க செய்தார்கள். வஞ்சிக்கப்பட்ட கிறிஸ்தவர்கள் இன்றுவரை அதை நியாயப்படுத்திப் பின்பற்றுகிறார்கள்.
7. இந்த Papacy என்றழைக்கப்படும் ரோமன் கத்தோலிக்க திருச்சபை, பூமியை 1260 வருடங்கள் ஆட்சி செய்து சுவிசேஷமும், வேதவசனமும் பரவவிடாமல் பரிசுத்தவான்களை எவ்வாறு துன்பப்படுத்தி கொலை செய்தது என்பதை யோவானின் தரிசனங்களின் அடிப்படையில் விளக்கமாகப் பார்க்க இருக்கிறோம்.
8. இந்த ராஜ்ஜியம் முற்றிலும் அழிக்கப்பட்டு இதன் முடிவில் தான் இயேசுவின் இரண்டாம் பகிரங்க வருகையும் இருக்கும் என்று இந்த அதிகாரங்கள் தெளிவாக சொல்கின்றன. இதில் எங்கும் சபை ரகசியமாக எடுத்துக்கொள்ளப்படும் என்று மறைமுகமாகக் கூட சொல்லப்படவில்லை. அந்திகிறிஸ்து கடைசி ஏழு வருடங்களில் தான் தோன்றுவான் என்று தவறாகப் புரிந்துகொள்பவர்களை, அதற்கு முன்பு சபை ரகசியமாக எடுத்துக்கொள்ளப்படும் என்று நம்ப வைப்பது எளிதான ஒன்று தானே?

இந்த ரோம சாம்ராஜ்ஜியம் ஆட்சியில் இருக்கும்போது தான் இயேசு உலகில் வந்தார். அவரை சிலுவையில் கொன்றதால் இந்த சாம்ராஜ்ஜியமும் அதன் வழித்தோன்றல்களும் தான் அந்திகிறிஸ்துவின் சாம்ராஜ்ஜியமாக இருக்கமுடியும். இயேசு உலகில் வாழ்ந்த காலமாகிய கி.மு 4 முதல் கி.பி 30 வரையிலான காலங்களைப் பற்றி சுவிசேஷங்கள் சொல்வதாலும், அதற்குப் பின்பு வரும் காலங்களைப் பற்றி அப்போஸ்தலர் நடபடிகள் சொல்வதாலும், எருசலேமின் கி.பி 70 ஆம் வருட நிர்மூலத்தைப் பற்றி இயேசு தீர்க்கதரிசனமாக சொல்லியிருப்பதாலும், அடுத்த சில அத்தியாயங்களில் முதல் நூற்றாண்டுகளில் நடைபெற்ற சம்பவங்களையும், சொல்லப்பட்ட தீர்க்கதரிசனங்களையும் வேத வசனங்களின் அடிப்படையில் விரிவாகப் பார்க்க இருக்கிறோம்.