ஜலப்பிரளயத்திற்கு பின்பு தான் பூமியின் பெரும்பாலான இடங்கள் மனிதர்களால் குடியேற்றம் பெற்றன என்று நாம் முந்தைய அத்தியாயத்தில் பார்த்தோம். இதற்குப்பின் தான் எகிப்துதேசம் என்பதே வேதத்தில் உள்ளே வருகின்றது. ஆபிரகாம் கானானில் பஞ்சம் உண்டானபடியால் எகிப்துக்கு போனான் (ஆதியாகமம் 12:10) என்று முதல்முறையாக வேதாகமத்தில் அறிமுகம் செய்யப்படுகிறது. ஆபிரகாமுடைய காலம் தொடங்கி, உலகம் என்றால் தற்போதைய ஐரோப்பா, ஆசியா, ஆசியா மைனர் (மத்திய கிழக்கு நாடுகள்), ஆப்பிரிக்காவின் வடபகுதி மட்டுமே ஆகும்.

இயேசுவின் காலத்தில் உலகம்

இயேசுகிறிஸ்து உலகத்தில் வந்த காலக்கட்டத்திலும் உலகம் என்றாலே இவைகளில் வாழும் மக்கள்தான். ஐரோப்பாவில் ரோமன் கத்தோலிக்க ராஜ்ஜியத்தின் ஆட்சியின் முடிவில் ஏற்பட்ட அசாதாரண சூழ்நிலைகளால் அங்கிருந்து வெளியேறினவர்கள் தான் அடுத்தகட்ட நாகரிக உலகின் முன்னோடிகள். கொலம்பஸ் அமெரிக்காவைக் கண்டுபிடித்ததே கி.பி 1492 ல் தான். அதுவரை அங்கு ஒருசில நாகரிகம் இல்லாத பழங்குடியினர் மட்டுமே வசித்துவந்துள்ளனர். இதற்குப்பின் தான் அதாவது 16 ஆம் நூற்றாண்டில் தான் மத, அரசியல் ரீதியான காரணங்களால் பல ஐரோப்பியர்கள் அமெரிக்க கண்டங்களை ஆக்கிரமித்து குடியேற ஆரம்பித்தார்கள். இவர்கள் ஆக்கிரமித்த நிலங்களில் வேலை செய்ய பல கறுப்பின ஆப்பிரிக்கர்கள் அடிமைகளாகக் கொண்டுசெல்லப்பட்டு குடியேற்றப்பட்டனர். இப்படி உருவாகி கி.பி 1776ல் அமெரிக்கா குடியரசாக அறிவிக்கப்பட்டது. இதேபோல் தான் ஆஸ்திரேலியாவும் இங்கிலாந்தின் காலனி ஆதிக்க நாடாக இருந்து சமீபத்தில் உருவானதுதான். எனவே வேதப்புத்தகத்தில் உள்ள தீர்க்கதரிசனங்களில் வரும் ‘உலகம்’, ‘பூமியின் குடிகள்’ போன்ற வார்த்தைகள் அக்காலத்தைய ஐரோப்பாவையும், குடியேற்றம் பெற்றிருந்த மத்திய கிழக்கு ஆசியாவையும், ஒருசில ஆப்பிரிக்க நாடுகளையுமே குறிக்கும். அதிலும் ஐரோப்பிய கண்டத்திலும், ஆசியா மைனரிலும் மட்டுமே குறைந்த நிலப்பரப்பில் பெருமளவு மக்கள் இருந்தனர்.

ராஜ்ஜியங்களின் எழுச்சியும் வீழ்ச்சியும்

தானியேல் மற்றும் வெளிப்படுத்தின விசேஷம் புத்தகங்கள், கடைசிக்காலத்தைக் குறித்த தீர்க்கதரிசன புத்தகங்கள் (Apocalyptic books) ஆகும். இவைகள் இரண்டிலும், பூமியில் இதுவரை ஆண்டுவந்த ராஜ்ஜியங்கள் அல்லது வல்லரசுகளின் தோற்றம், வீழ்ச்சியைப் பற்றி விவரிக்கப்பட்டுள்ளது. இந்த ராஜ்ஜியங்களின் மூலம் அந்திக்கிறிஸ்துவாகிய சாத்தான் எப்படி தனது ஆதிக்கத்தை செயல்படுத்துவான் என்பதையும், அவனது ராஜ்ஜியத்தை இயேசுகிறிஸ்து எப்போது, எப்படி வீழ்த்தி முடிவில்லாத அவரது ராஜ்ஜியத்தை ஸ்தாபிப்பார் என்பதையும்தான் இந்த இரண்டு புத்தகங்களும் சங்கேத பாஷைகளில் சொல்லியிருக்கின்றன. எனவே நாம் தானியேல் மற்றும் வெளிப்படுத்தலின் கடைசிகால தீர்க்கதரிசனங்களைப் புரிந்துகொள்ளவேண்டும் என்றால் இதுவரை பூமியில் எழும்பி, அழிந்துபோன ராஜ்ஜியங்களைக் குறித்த அறிவுவேண்டும்.

வரலாறு அறியாததின் விளைவு

உலகப்பிரகாரமான மனிதனாகிய வின்ஸ்டன் சர்ச்சிலே ‘கடந்த கால வரலாற்றை அறியாதவன், வருங்காலங்களில் செய்த தவறையே திரும்பத் திரும்ப செய்வான்’ என்று கூறியுள்ளது நம் சபைகளுக்கு மிகப்பொருந்தும். லூக்கா மற்றும் பவுல் எழுதிவைத்த வரலாற்றுக் குறிப்புகளுக்குப் பின் கடந்த 1950 வருடங்களாக பூமியின் ராஜ்ஜியங்களில் என்ன நடந்தது என்று நாம் திரும்பிப்பார்க்காமல் இருப்பதால் தான், நமது சபைகள் இரண்டு தவறுகளை செய்கின்றன. ஒன்று, கடைசிகாலங்களைப் பற்றிய தானியேல் மற்றும் வெளிப்படுத்தலின் தீர்க்கதரிசனங்களின் அர்த்தங்களைப் புரிந்துகொள்ள முயற்சிப்பதே இல்லை. இரண்டாவது, இன்றைக்கு நடக்கும் காரியங்களை மட்டும் பிடித்துக்கொண்டு தவறான முறைகளில் வியாக்கியானம் செய்து ஜனங்களை தேவையில்லாமல் பயப்படுத்துவது அல்லது இரண்டாவது வாய்ப்பு உண்டு என்று சொல்லி தவறான நம்பிக்கையை வளர்ப்பது. யோசேப்பின் வரலாறை அறியாத பார்வோன் வந்தபின்பு தான் இஸ்ரவேலர்களுக்கு எகிப்தில் உபத்திரவம் ஆரம்பித்தது. அதைப்போல நீங்களும் வரலாற்றை அறியாமல் தவறான நம்பிக்கைகளுக்கு உட்பட்டுவிடக்கூடாது. இந்தப் புத்தகத்தை முழுவதுமாக வாசித்து முடித்தாலே நான் மனபாரத்தோடு வாதிடுவதன் அர்த்தம் உங்களுக்குப் புரிந்துவிடும்.

எத்தனை ராஜ்ஜியங்கள்?

பூமியில் இதுவரை வந்துசென்ற ராஜ்ஜியங்களைக் குறித்த அத்தனை ஆதாரங்களையும் உடைய ஒரே புத்தகம் நம் பரிசுத்த வேதாகமம் தான். அவை எத்தனை என்பதைத் தெரிந்துகொள்ள மூலவசனமாக ஆண்டவர் நமக்கு கொடுத்தது தான் வெளிப்படுத்தின